![](https://www.reporter.al/wp-content/uploads/Grupi-i-aktivisteve-gjate-k%C3%ABndimit-dhe-performimit-te-himnit-n%C3%AB-sheshin-N%C3%ABn%C3%AB-Tereza-2.jpg)
Aktiviste të të drejtave të njeriut u bashkuan në sheshin “Nënë Tereza” në Tiranë për të performuar himnin me titull “Dhunuesi je ti” në mbrojtje të të drejtave të grave dhe vajzave edhe në Shqipëri.
![](https://www.reporter.al/wp-content/uploads/Grupi-i-aktivisteve-gjate-k%C3%ABndimit-dhe-performimit-te-himnit-n%C3%AB-sheshin-N%C3%ABn%C3%AB-Tereza-600x400.jpg)
Pasditen e së hënës në sheshin “Nënë Tereza” në Tiranë, një grup aktivistesh të të drejtave të njeriut u solidarizuan me një himn kundër dhunës dhe diskriminimit ndaj grave dhe vajzave. Kjo lëvizje është një hallkë në zinxhirin e marshimeve që janë duke u zhvilluar në vende të ndryshme të botës, të frymëzuara nga valët e manifestimeve feministe në Kili.
“Ideja ka lindur nga një grup feminist në Kili si një reagim ndaj dhunimit të të drejtave të njeriut. Shumë prej grave dhe vajzave protestuese në Kili janë dhunuar në komisariate, dhe shteti nuk ka reaguar për të çuar njerëzit përgjegjës para drejtësisë. Këto raste janë vënë re dhe në Shqipëri,” tha Deni Sanxhaku, pjesë e Organizatës së Mbrojtjes së të Drejtave Civile.
“Ne kemi pasur raste të grave apo të grave të dhunuara që kanë pasur urdhra mbrojteje apo kanë njoftuar në polici për partnerë të dhunshëm, dhe policia nga ana tjetër nuk ka marrë asnjë masë mbrojtëse për këto gra dhe vajza,” shtoi Sanxhaku.
Aktivistet –përfaqësuese të organizatave të mbrojtjes së të drejtave të njeriut performuan himnin e rezistencën kiliane të përshtatur në gjuhën shqipe në sheshin “Nënë Tereza”, duke targetuar sistemin shtetëror dhe politikat e padrejtësive sociale si bazë të diskriminimit me bazë gjinor. Teksti përshkruan sesi dhuna me bazë gjinore nuk është problem moral, por politik. Aty thuhet qartë se institucionet, policia, gjykata, dhe shteti janë përgjegjës të vazhdueshëm të shkeljes së të drejtave të gruas.
“Seksizmi dhe diskriminimi gjinor si në shoqëri ashtu dhe në tregun e punës është prezent në Shqipëri. Sipas të dhënave të OKB-së, raporti i grave të dhunuara psikologjikisht, fizikisht, apo seksualisht në Shqipëri është një në dy. Këtë e vuajnë më shumë gratë e margjinalizuara, që janë ato të periferive, gratë e moshuara, gratë e komunitetit LGBT, gratë me aftësi të kufizuara ose gratë e varfëra,” shpjegoi Deni Sanxhaku arsyet e protestës.
“Është e rëndësishme që të flasim për këto gra dhe jo vetëm për dhunën që ushtrohet ndaj tyre nga partnerët e tyre, por edhe dhunën ekonomike dhe sociale që ushtron shteti. Prandaj dhe teksti i këngës është përshtatur në mënyrë të tillë që t'i adresohet Kryeministrisë, t'i adresohet oligarkisë, t'i adresohet shtetit,” shtoi ajo.
![](https://www.reporter.al/wp-content/uploads/Grupi-i-aktivisteve-gjate-k%C3%ABndimit-dhe-performimit-te-himnit-n%C3%AB-sheshin-N%C3%ABn%C3%AB-Tereza-2-600x400.jpg)
![](https://www.reporter.al/wp-content/uploads/Aktivistet-takohen-para-protest%C3%ABs-tek-sheshi-N%C3%ABn%C3%AB-Tereza-600x400.jpg)