![](https://www.reporter.al/wp-content/uploads/2022/10/FOTO-07_Nje-shperndares-ne-trafikun-e-Tiranes._Foto_Nensi-Bogdani-scaled.jpg)
Shpërndarja ose siç njihet rëndom në anglisht, “Delivery”, është një zanat që po pëson rritje të vazhdueshme gjatë viteve të fundit. Në Shqipëri, ky shërbim u prezantua fillimisht në tregun e ushqimit, por gjatë periudhës së pandemisë u zgjerua edhe drejt produkteve të tjera.
![](https://www.reporter.al/wp-content/uploads/2022/10/FOTO-01_Romeo-punon-si-shperndares-ilacesh-per-nje-farmaci.-Foto_Nensi-Bogdani-600x400.jpg)
Renis Hoxha punon si shpërndarës prej gjashtë vitesh dhe thotë se ditët e tij të punës janë tejet të ngarkuara. Megjithatë, trafiku i orëve të drekës është ajo që e sfilit më shumë. “Orët e drekës në rrugët e Tiranës janë të tmerrshme. Plus ne kemi dhe problemin e orës, për të arritur në kohë shpërndarjen e produktit dhe marrjen e porosisë së radhës,” tha Renisi për BIRN.
![](https://www.reporter.al/wp-content/uploads/2022/10/FOTO-02_Renis-Gjika-gjashte-vite-shperndares-pranon-se-trafiku-i-oreve-te-drekes-eshte-veshtiresia-e-tij-kryesore.-Foto_Nensi-Bogdani-600x400.jpg)
Me kërkesat e shumta të blerjeve në internet dhe shpërndarjes së produkteve aty ku ndodhet klienti, shpërndarësit e Tiranës përballen gjithashtu me vështirësi të shumta. Kryesisht ata ankohen për trafikun e rënduar, orët e gjata të punës dhe rreziqet e vazhdueshme në qarkullimin mes makinave.
![](https://www.reporter.al/wp-content/uploads/2022/10/FOTO-03_Shperndares-duke-pritur-ne-semaforin-e-kryqezimit-te-Don-Boskos.Foto_Nensi-Bogdani_-600x400.jpg)
Orët e gjata të punës dhe problemet me trafikun i konfirmon edhe shpërndarësi i një fast-foodi pranë bulevardit Zogu i Parë në Tiranë. Prej 8 vitesh në këtë profesion, ai thotë se punon 11 orë çdo ditë si shpërndarës i porosive ushqimore. “Tani janë bërë të gjithë ‘delivery’, i gjen kudo. Por e kemi shumë të vështirë punën,” tregon Bujari.
“Unë rri 11 orë majë motorit. E imagjinon dot me këtë trafik si kalon dita në motor,” ironizon ai për peripecitë që i duhet të kalojë përditë në trafikun e rënduar të kryeqytetit.
![](https://www.reporter.al/wp-content/uploads/2022/10/FOTO-04_Shperndares-i-nje-fast-foodi.-Ai-punon-ne-profesion-prej-8-viteve-me-orar-te-zgjatur-pune-deri-ne-11-ore.-Foto_Nensi-Bogdani-600x400.jpg)
Shpeshherë, shpërndarësit ndjehen nën presionin e kohës për të dorëzuar pa vonesa porositë, pasi trafiku shpeshherë i detyron të vonohen. “Klienti nuk pyet për trafik, klienti e do në orar. Përndryshe ai kalon tek dyqani tjetër,” tha pronari i picerisë “Benvenuto” pranë Zogut të Zi.
![](https://www.reporter.al/wp-content/uploads/2022/10/FOTO-05_Nje-shperndares-i-nje-restoranti-peshku-duke-ngarkuar-porosite-e-klienteve-ne-motorrin-e-tij.-Foto_Nensi-Bogdani-597x400.jpg)
Sipas shpërndarësve, një dërgesë me motor brenda Tiranës merr mesatarisht njëzet minuta vajtje-ardhje, por ky interval kohor jo gjithmonë u jepet nga pronarët, disa prej të cilëve kërkojnë që shpërndarja të kryhet më shpejt.
![](https://www.reporter.al/wp-content/uploads/2022/10/FOTO-06_Nje-motor-shperndarje-per-pica.-Foto_Nensi-Bogdani_-600x400.jpg)
“Ne duhet ta kemi kryer porosinë dhe të jemi kthyer brenda 13 minutave, kështu na e kërkon pronari. Kjo na vendos në presion për të kapur kohën dhe për të menaxhuar me trafikun e rëndë,” i tha BIRN njëri prej shpërndarësve.
![](https://www.reporter.al/wp-content/uploads/2022/10/FOTO-07_Nje-shperndares-ne-trafikun-e-Tiranes._Foto_Nensi-Bogdani-498x400.jpg)
Megjithë vështirësitë, ka edhe nga ata që ndjehen mirë me profesionin që kanë zgjedhur.
“Unë nuk e kam problem, nuk kam ndonjë vështirësi. Përkundrazi, më pëlqen që t’u shërbej atyre që kanë nevojë për ilaçe,” thotë Romeo, shpërndarësi i medikamenteve të një farmacie.
![](https://www.reporter.al/wp-content/uploads/2022/10/FOTO-08_Romeo-punon-si-shperndares-ilacesh-per-nje-farmaci.-Foto_Nensi-Bogdani-2-600x400.jpg)