![](https://www.reporter.al/wp-content/uploads/2022/11/Shkolla-e-shales-.jpeg)
Në mes të shtatorit, qeveria e Shqipërisë njoftoi mbylljen përmes heqjes së licencës së kolegjit “Mehmet Akif” në Tiranë, duke e motivuar vendimin me mungesën e “certifikimit ligjor të standardeve të godinës”.
Godina e re e shkollës jo-publike kishte shërbyer më parë si univesitet, ndaj vendimi i Ministrisë së Arsimit u pa me dyshim dhe u kundërshtua me protesta nga gjimnazistët dhe stafi arsimor.
Por ndërsa në Tiranë diskutohej për godinën në dukje luksoze që i kushtoi licencën kolegjit “Mehmet Akif”, 200 kilometra nga Tirana, shtatëdhjetë e tetë fëmijë të Njësisë Administrative Shalë në bashkinë e Shkodrës janë të detyruar të bëjnë mësim nën një çati që pikon dhe në kushte të mjera.
“Nuk është vënë dorë prej 15 vjetësh,” tha Kin Nika, drejtor i shkollës së mesme të bashkuar “Mehmet Shpendi” në Shalë. Ai shpjegon se i vetmi ndryshim prej vitesh është lidhja me ujësjellësin, ndërsa të paktën gjysma perëndimore e godinës ka një çati që pikon dhe pjesët e tjera janë në gjendje të rëndë.
E pyetur në lidhje me lejimin e funksionimit të kësaj shkolle dhe masat e marra për gjendjen atje, Ministria e Arsimit ia kaloi përgjegjësitë bashkisë së Shkodrës, duke vënë në dukje se ishte pushteti vendor që duhej të kujdesej për kushtet e godinës.
Nga ana e saj, bashkia Shkodër u justifikua me argumentin se kishte tentuar disa herë rikonstruksionin e çatisë së godinës, por “fituesit e dy tenderave ishin tërhequr pasi ishte lidhur kontrata dhe një tender i tretë kishte dështuar”.
Situata mizerabël
Shkolla e Mesme e Bashkuar “Mehmet Shpendi” në njësinë e Shalës ofron shërbim arsimor për nxënës të nivelit bazë dhe atij të mesëm. Në këtë shkollë e ndjekin mësimin 10 nxënës të klasave I-IX dhe 68 gjimnazistë.
Godina 3-katëshe e shkollës “Mehmet Shpendi” i ngjan një hapësire të braktisur. Një pjesë e mirë e klasave janë të mbyllura. Në disa mungojnë dritaret, ndërsa tualetet siç duken në videot e filmuar nga prindërit që iu vunë në dispozicion BIRN, janë jo higjenike.
Pjesë të çatisë së shkollës po ashtu pikojnë dhe njëra anë e saj nuk mund të përdoret për shkak të lagështisë dhe ujit që vjen nga soleta.
Megjithatë, mungesa e një zgjidhjeje nga institucionet i ka lënë mësuesit dhe prindërit në udhëkryq, ndërsa janë të detyruar të vazhdojnë mësimin dhe mbajnë parasysh edhe rreziqet e godinës së amortizuar.
Zef Skollaj, i cili tha se kishte tre vajza që mësonin në shkollë dhe që denoncoi te BIRN situatën e godinës, tha se ajo ishte në kushte mizerabël.
“Kjo është gjendja e shkollës “Mehmet Shpendi”, prej vitesh 3 vajzat e mia bëjnë mësim këtu. Shkolla është në gjendje mizerabël dhe nuk plotëson as kushtet më minimale,”tha Skollaj, duke u theksuar se drejtoria e shkollës nuk ishte ankuar mjaftueshëm.
Nga ana e tij, drejtori Nika i tha BIRN se e kishte ngritur zërin sa herë kishte pasur mundësi. Nika tha se ishin rikonstruktuar dy shkolla vartëse në të njëjtën zonë, por jo godina qendrore që sipas tij nuk kishte parë ndërhyrje që prej vitesh.
“U kam thënë që duhet ta shohin,” tha ai, ndërsa sjhtoi se nuk kishte parë askënd nga bashkia të shkonte për të verifikuar situatën apo gjendjen e infrastrukturës.
Tendera të dështuar
Gjatë dy viteve të fundit, bashkia e Shkodrës ka zhvilluar tre tendera për rikonstruksionin e shkollës “Mehmet Shpendi”, por ata kanë dështuar. Po ashtu, rikonstruksioni i shkollës është parashikuar edhe në buxhetin e vitit 2022.
“Rikonstruksioni i tarracës së objektit është tenderuar tri herë gjatë këtyre tre viteve,” tha bashkia e Shkodrës në përgjigje të kërkesës për informacion, ndërsa përmendi se dy kompanitë fituese të kontratave që u rritën nga 2.6 milionë në 3.5 milionë lekë u tërhoqën pas inspektimit të objektit. Kompanitë fituese të tenderit nuk u arritën dot për koment.
Ndërkohë, tenderi i tretë në të cilin vlera e fondit limit u rrit në 5 milionë lekë nuk u zhvillua fare për shkak të mungesës së interesit. “Objekti është tenderuar për herë të tretë, këtë herë pasi janë kryer ndryshimet në projekt dhe rritjes së fondit limit nga 3 598 333 pa TVSh në 5 019 615 , dhe ku në vend të rikonstruksionit të tarracës objektit do të kryhet ndërtimi i një çatie. Procedura ka numër reference REF 43623-09-28-2022 me datën 28.09.2022 edhe këtë herë tenderi ka dështuar, pasi asnjë operator nuk ka paraqitur ofertë,” shtoi bashkia.
Në anën tjetër, Ministria e Arsimit u shfajësua me kompetencat, duke ia referuar kërkesën për informacion zyrës rajonale të Arsimit Parauniversitar.
Kjo e fundit pranoi njohjen me problematikën, por këmbënguli se masat duhej të merreshin nga bashkia e Shkodrës. “Në fillim të vitit shkollor 2021-2022 janë deklaruar problematika në gjendjen infrastrukturore të shkollës së Mesme të Bashkuar “Mehmet Shpendi” të cilat i janë bërë prezent njësisë bazë të qeverisjes vendore”, thuhet në përgjigje.
Zyra vendore e arsimit tha se kishte kërkuar plotësimin e kushteve që në korrik, por si përgjigje ishte marrë vetëm fakti se një tender i ri për rikonstruksionin e shkollës pritej të zhvillohej së shpejti.