![](https://www.reporter.al/wp-content/uploads/2023/01/Rruge-e-permbytur-ne-lezhe-.jpeg)
Banorët eLezhës u zunë në befasi të enjten, pasi një rrebesh me rreth 70 milimetra shi në një kohë të shkurtër, përmbyti një pjesë të rrugëve dhe disa dhjetëra banesa.
Problematika më e madhe u paraqit në fshatin Lalm i Ri, ku dalja nga shtrati e kanaleve kulluese përmbyti shtëpitë e banorëve.
“Kam 30 centimetra ujë në shtëpi. Jemi zhvendos në kat të dytë, sepse kati parë është nën ujë,” tha Kristi Ndoj, banor i Lalmit të Ri. Ndoji thotë se ngjarja ishte e rrallë për ta dhe ai nuk mbante mend rast tjetër në të paktën 15 vjet.
Ndërkohë, vërshimi i disa përrenjve malorë bllokoi rrugën e vjetër Lezhë-Milot dhe shumë makina u bllokuan në rrugë, pasi uji arriti deri në 50 cm.
Banorët e zonës fajësojnë mungesën e investimeve për këtë situatë. “Këtu rruga është bllokuar që prej orëve të mëngjesit. Kam ndërhyrë bashkë me fshatarët e mi, duke iu ardhur në ndihmë qytetareve të cilët kanë ngelur në mes të ujit. Askush nuk ka ardhur për të bërë zhbllokimin e rrugës,” thotë Odise Kolthi, banor i Spitenit. Kolthi ankohet se prej vitesh nuk është bërë asnjë punë në hapjen e kanaleve kulluese dhe rehabilitimin e përrenjve malorë.
Rrugët u mbuluan nga uji edhe në qytetin e Lezhës, ndërsa u përmbytën edhe oborret e shkollave 9-vjeçare “Gjergj Kastrioti” dhe “Besëlidhja”.
![](https://www.reporter.al/wp-content/uploads/2023/01/Parking-i-permbutyr-lezhe--533x400.jpeg)
Nënkryetari i Bashkisë Lezhës, Ermal Pacaj thotë se ka pasur reshje të dendura shiu brenda një harku kohor të shkurtër, ndërsa të gjitha strukturat e emergjencave ndodhen në terren dhe situatat është nën kontroll të plotë.
“Ka patur rreth 70 mm shi në një hark kohor shumë të shkurtër. Kjo solli prurje të jashtëzakonshme në përrenj, kanale e lumenj, duke sjellë disa problematika. Të gjitha grupet emergjencës me punëtorë e mjete ndodhen në terren dhe po ju vijnë në ndihmë banorëve,” tha Pacaj.
Ai pretendoi se ishin marrë masat në hapje të kanaleve kulluese dhe se zonat problematike ishin identifikuar. “Kemi gjithçka në kontroll, kryesorja është evakuimi i personave që janë në probleme pastaj do shohim se ku mund të ndërhyjmë me emergjencat më vonë,' shtoi ai.
Ndërkohë, moti keq me reshje shiu dhe erë të fortë ka krijuar probleme dhe me furnizimin me energji elektrike në shumë zona të Lezhës. Dëmtimi i linjave elektrike ka lënë në errësirë shumë fshatra, por drejtori Rajonal i Operatorit të Shpërndarjes së Energjisë Elektrike, Armand Zhuka, tha se ata ishin përqendruar tek furnizimi me energji pa ndërprerje i ujësjellësve dhe hidrovorëve. Ai tha se më pas do të merreshin masa për të kthyer energjinë në të gjithë zonën.