![](https://www.reporter.al/wp-content/uploads/2024/09/Ermal-Onuzi-dhe-kreu-i-ministrise-.jpeg)
Ministri i Brendshëm, Ervin Hoxha prezantoi të martën drejtorin e ri të Gardës së Republikës, Ermal Onuzi, i cili, sipas ministrit u zgjodh pas një konkursi të hapur ku garuan profesionistë të fushës së sigurisë.
Onuzit iu dha e drejta për të kandiduar për këtë detyrë të rëndësishme pas ndryshimeve ligjore që Partia Socialiste në pushtet votoi në mars të këtij viti, duke lehtësuar kriteret për t’u bërë drejtues i Gardës.
Opozita paralajmëroi në atë kohë se ndryshimet ligjore ishin të “qepura me porosi” për të sjellë në krye të Gardës pikërisht Onuzin, për të cilin deputetë të PD-së thanë se ishte kushëri me Shefqet Kastratin, biznesmenin që zotëron koncensionin e Aeroportit të Rinasit, ku Onuzi ka punuar si shef sigurie.
Në seancën plenare ku u votuan këto ndryshime, kreu i grupit parlamentar të PD-së, Gazment Bardhi i bëri thirrje Kuvendit që të tërhiqej nga votimi i një ligji, që sipas tij, ishte hartuar për emërimin e një personi.
“Bëhet fjalë për një ligj mirëfilli të porositur,” tha Bardhi, duke aluduar se “ishte porositur nga oligarku Shefqet Kastrati për të emëruar shtetasin Ermal Onuzi në krye të Gardës së Republikës”.
Taulant Balla, asokohe ministër i Brendshëm, i hodhi poshtë aludimet e opozitës duke i cilësuar si “lexim horoskopi apo filxhani” dhe i mbrojti ndryshimet ligjore si nevojë për përmirësim të punës së këtij institucioni.
“Përfshirë edhe një garë më të hapur në përzgjedhjen e drejtuesit, sipas standardeve më të mira,” tha Balla në seancën e zhvilluar në mars.
Ndryshimet në ligjin për Gardën e Republikës u inicuan nga deputeti socialist Nasip Naço, në të njëjtën kohë kur kreu jetëgjatë i Gardës, Gramoz Sako dha dorëheqjen në shkurt të këtij viti.
Sipas ligjit të mëparshëm, Drejtori i Përgjithshëm i Gardës së Republikës duhet të ishte punonjës i Gardës që mban gradën “Drejtues i parë” ose “Drejtues i lartë” dhe emërohej nga Kryeministri me propozim të Ministrit të Brendshëm.
Ndërsa dispozita ligjore e miratuar në mënyrë të njëanshme nga mazhoranca parashikon që drejtuesi i Gardës do të zgjidhej pas një konkurrimi të hapur, sipas procedurës dhe rregullave që vendos Ministri i Brendshëm. Në fund të kësaj gare, ku i vetmi kriter profesional janë 10 vite përvojë pune në fushën e sigurisë, ministri përzgjedh një emër që ia dërgon kryeministrit.
Ermal Onuzi u zgjodh në krye të Gardës së Republikës mes gjashtë kandidatëve, njëri prej të cilëve edhe Artan Didi, ish-drejtor i Përgjithshëm i Policisë së Shtetit. I pyetur nga BIRN mbi denoncimin e mëparshëm të opozitës, Onuzi tha përmes një bisede telefonike: “Nuk kam asnjë lidhje me Shefqet Kastratin”.
Edhe grupi “Kastrati”* dhe presidenti i tij, Shefqet Kastrati hodhën poshtë çdo aludim për lidhje familje apo ndërhyrje në procesin e emërimit të Onuzit në krye të Gardës së Republikës.
“Në emër të grupit Kastrati dhe presidentit të tij z.Shefqet Kastrati, ju bëjmë me dije se nuk ekziston asnjë lidhje familjare ose shoqërore me zyrtarin e sapoemëruar në krye të institucionit të Gardës së Republikës. Gjithashtu deklarojmë se çdo aludim për ndërhyrje në proçesin e emërimit të këtij zyrtari është i pavërtetë dhe i pambështetur në asnjë fakt,” deklaroi grupi “Kastrati” në një reagim për BIRN.
* Shkrimi u përditësua për të përfshirë qëndrimin e grupit “Kastrati”.