![](https://www.reporter.al/wp-content/uploads/img_0235.jpg)
Dy europarlamentarë do të vijnë në Shqipëri për të ndërmjetësuar fundin e bojkotit të Partisë Demokratike në kuvend në prag të skadimit te mandatit të deputetëve të djathtë.
![Eduard Kukan, anëtar i Partisë Popullore Europiane. Foto: PE](https://www.reporter.al/wp-content/uploads/img_0235-300x166.jpg)
Në kuadër të mbarëvajtjes së procesit të integrimit të Shqipërisë në BE, dy grupet politike europiane, Aleanca Progresive e Socialistëve dhe Demokratëve (S&D) dhe Partia Popullore Europiane kanë ngarkuar përfaqësuesit e tyre Knut Fleckenstein dhe Eduard Kukan me përgjegjësinë e ndërmjetësimit të marrëveshjes mes maxhorancës dhe opozitës shqiptare.
Ata do të ndihmojnë partitë kryesore të rikrijojnë dialogun politik dhe do të inkurajojnë opozitën t'i japi fund bojkotit dhe të rifillojë punën në parlament.
“Dialogu politik konstruktiv dhe i qëndrueshëm mes shumicës qeverisëse dhe opozitës, së bashku me debatet politike që ndodhin në parlament, janë jetësore për procesin e integrimit në BE,” shkruan Kukan në një deklaratë për median.
Fleckenstein do të negociojë me shumicën, ndërsa Kukan me opozitën.
Kjo e fundit e ka braktisur parlamentin që prej 10 korrikut të këtij viti pas dhunës së ushtruar ndaj demokratit Gent Strazimiri gjatë një seance plenare.
Bojkoti i ri riktheu ngërçin e vjetër në skenën politike shqiptare, duke ftuar edhe një tjetër herë në bord komunitetin ndërkombëtar për të luajtur rolin e arbitrit.
Pas një mungese afro gjashtë mujore në Kuvend opozita rrezikon t'i djeg mandatet e deputetëve të saj, arsye për të cilën disa deputetë në radhët e Demokratëve kanë treguar padurim për t'u kthyer në parlament.
Si kusht për fundin e bojkotit opozita ka kërkuar miratimin e një ligji për dekriminalizimin e Kuvendit.
Eduard Kukan dhe Fleckenstein vijnë në Tiranë për të gjetur një zgjidhje për ngërçin e krijuar dhe për të arritur një marrëveshje bashkëpunimi mes partive.
Knut Fleckenstein do të jetë në Shqipëri të enjten dhe të premten në datat 18-19 dhjetor, ndërsa Eduard Kukan do të mbajë vizitën e tij të dielën dhe të hënën më 21-22 dhjetor.
Marrëveshja që do t'i hapë dyert opozitës në Kuvend pritet të formalizohet në fillimin e javës së ardhshme, pasi maxhoranca duket se ka rënë dakord që të miratojë projektligjin që ekspozon para publikut, deputetët me të kaluar të errët kriminale.
Mesazhet e vizitës së Knut Fleckenstein dhe Eduard Kukan janë inkurajimi i opozitës për t'u kthyer në parlament, rikrijimi i dialogut politik dhe pjesëmarrjes në punën e parlamentit, si dhe inkurajimi i të gjitha partive politike për t'u përfshirë në procesin drejt dekriminalizimit të parlamentit dhe institucioneve të tjera publike.