![](https://www.reporter.al/wp-content/uploads/mh17_ukraine_plane_ap_img.jpg)
Agjencia e përbashkët serbe dhe malazeze e trafikut ajror pret të ardhura të larta nga tarifat e fluturimit në 2015 pasi shumë linja ajrore po shmangin hapësirën ukrainase.
![Avioni i Malaysia Airlines MH17 i rrëzuar në Ukrainë. Foto: BETA/AP.](https://www.reporter.al/wp-content/uploads/mh17_ukraine_plane_ap_img-300x200.jpg)
Agjencia e kontrollit të trafikut ajror, SMATSA, pritet të fitojë më shumë se 68 milionë euro nga ndryshimi i itinerarit në 2015, pasi disa linja të fuqishme ajrore europiane ndryshuan itineraret e fluturimit mbi Serbi dhe Malin e Zi prej konflikteve të armatosura në Ukrainë.
Sipas një raporti të SMATSA të përgatitur për qeverinë malazeze, agjencia pret që fluturimet që do përdorin hapësirën ajrore mbi Serbi dhe Malin e Zi do të rriten me rreth 8 për qind prej caktimit të itinerarit të ri.
Të ardhurat totale të agjencisë nga terminalet, trajnimi i pilotëve, kontrolli i fluturimeve dhe mirëmbajtja e avionëve pritet të arrijë 106 milionë euro në 2015.
“Situata në Ukrainë do të kontribuojë në kalimin e një numri të madh fluturimesh në kontrollin e SMATSA,” thuhej në raport.
SMATSA është i vetmi institucion i përbashkët serb dhe malazez që ka mbetur pas ndarjes së dy vendeve në 2006, kur Mali i Zi rifitoi pavarësinë.
Me bazë në Beograd, Serbi, është përgjegjës për hapësirën ajrore pjesë të Adriatikut jugor dhe për 55 për qind të hapësirës ajrore të sipërme të Bosnjës dhe Hercegovinës.
SMATSA pritet të fitojë rreth 6 milionë euro nga fluturimet mbi Bosnje-Hercegovinë këtë vit.
Mbyllja e hapësirës ajrore mbi Ukrainën lindore të shkatërruar nga lufta që nga vera e shkuar ka ndërprerë një korridor të njohur ajror që lidhte Europën Perëndimore me Lindjen e Mesme dhe Azinë.
British Airways, Qantas dhe Cathay Pacific janë ndër linjat ajrore që kanë bërë devijime që nga korriku i shkuar në afërsi të zonës ku një avion i Malajzisë u rrëzua në Ukrainë.
Pasi MH17 me 298 persona në bord u rrëzua si rezultat i një sulmi të dyshuar me predhë, kompanitë që fluturojnë nga Frankfurti, Amsterdami, Parisi dhe Londra po i drejtojnë fluturimet për në Lindjen e Largët nga korridori jugor që kalon mbi Hungari, Bullgari dhe Rumani.