![](https://www.reporter.al/wp-content/uploads/edi-rama-futboll.jpg)
Zyrtarët e lartë të Ballkanit do të luajnë përballë homologëve europianë në sfidën simbolike të futbollit, që do të zhvillohet sonte në mbrëmje.
![Ministrat në konferencën e vitit 2014. Foto BETA.](https://www.reporter.al/wp-content/uploads/Berlin-Western-Balkan-Merkel-wth-regional-PMs-Photo-by-Beta-300x225.jpg)
Përpara Samitit të Ballkanit Perëndimor i cili do të mbahet të enjten më 27 gusht në Vjenë, ku zyrtarët e lartë të BE-së dhe të Ballkanit do të bisedojnë për çështjet kryesore të infrastrukturës, bashkëpunimit rajonal, rinisë dhe krizës së migrantëve, do të zhvillohet një ndeshje simbolike futbolli mes politikanëve që do të marrin pjesë në të.
Të mërkurën në mbrëmje, politikanët e Ballkanit do të luajnë një ndeshje futbolli kundër homologëve austriakë dhe gjermanë si dhe kundër zyrtarëve të BE.
Ata janë ndarë në dy skuadra: “BE-ja” dhe “BE-ja e ardhshme”.
Kryeministri shqiptar Rama do të jetë në një skuadër me Thaçin e Kosovës, Vuçiçin e Serbisë, Gruevskin e Maqedonisë dhe ministrat boshnjakë dhe malazezë, Crnadak dhe Luksiç.
Skuadra e BE-së mes të tjerëve do të ketë në lojë kryeministrin slloven Miro Cerar, ministrin e jashtëm austriak Sebastian Kurz, Sekretarin e përgjithshëm austriak të ministrisë për çështjet europiane dhe ndërkombëtare Michael Linhart dhe zyrtarë të tjerë.
Ndeshja do të gjykohet nga Komisioneri i BE-së për Zgjerimin, Johannes Hahn. Mendohet se sfida do të jetë një mënyrë për të shtensionuar bisedimet e gjata mbi çështje shumë të rëndësishme për të ardhmen e anëtarësimit të Ballkanit në BE.
Po ashtu, përfshirja në një skuadër e liderëve të vendeve fqinje të Ballkanit perëndimor do t'i kujtojë atyre nevojnë për bashkëpunim rajonal ‘për t'u kualifikuar' në Bashkimin Europian.
Nga ana tjetër BE-ja ka premtuar se do të akordojë rreth një miliard euro në infrastrukurë për vendet e Ballkanit Perëndimor.
Në një takim veçmas, kryeministri serb Vuçiç, ai i Kosovës Mustafa dhe kryeministri i Shqipërisë Rama, do të flasin me Bankën Europiane të Investimit dhe Bankën Europiane për Rindërtim dhe Zhvillim rreth ndërtimit të një autostrade nga Nisi në Serbinë jugore në kryeqytetin Prishtinë të Kosovës deri në qytetin bregdetar të Durrësit në Shqipëri.