Disa anëtarë kyç të partisë me shumicë shqiptare të Maqedonisë Bashkimi Demokratik për Integrim u ndanë për të krijuar një parti të re, përçarja më e fundit në rradhët e BDSH-së.
Pas mosmarrëveshjeve të shumta në rradhët e Bashkimit Demokratik për Integrim, dy figurat kryesore, deputeti dhe anëtari i asamblesë së përgjithshme të partisë Zuluf Adili si dhe Gëzim Ostreni ish sekretari i përgjithshëm i partisë, thanë se do të krijojnë një parti të re të quajtur Bashkimi.
Ostreni, një gjeneral me eksperiencë të gjatë në ushtrinë e ish-Jugosllavisë si dhe në luftërat ballkanike të viteve '90, qe edhe drejtuesi i shtabit të përgjithshëm të Ushtrisë Çlirimtare Kombëtare gjatë luftës së shkurtër në Maqedoni në vitin 2001 e cila solli marrëveshjen kuadër të paqes në Ohër.
“Partia e re do të ketë një koncept qytetar, gjë që do të thotë se Maqedonia duhet të jetë një vend që i përket të gjithë atyre që jetojnë në të dhe jo thjeshtë një etnie apo dy etnive,” tha Adili.
Ai tha se shpresonte se partia Bashkimi do të tërheqë disa deputetë aktualë të BDI. BDI ka aktualisht 20 nga 123 anëtarët e parlamentit.
“Të gjithë anëtarët e BDI të cilët nuk kanë skandale korrupsioni mbi supe janë të mirëpritur,” shtoi Adili, duke vërejtur se kjo nuk përfshin udhëheqësit aktualë të BDI.
Formimi i njoftuar i partisë së re shihet si kumbi i mosmarrëveshjes së gjatë politike brenda rradhëve të partisë kryesore të shqiptarëve të Maqedonisë, parti e cila aktualisht është në bashkëqeverisje me VMRO-DPMNE, partia e kryeministrit autokratik Nikola Gruevski.
Mosmarrëveshjet në parti u përshkallëzuan në dhunë në të shkuarën. Në tetor 2014, pesë njerëz u plagosën, njëri prej të cilëve rëndë, në një përleshje me armë në degën e BDI në Saraj, pranë Shkupit.
Në dhjetor të atij viti, një përleshje mes anëtarëve të BDI në Strugë, juglindje e Maqedonisë, përfundoi me shumë njerëz në spital.
Shenja të tjera mosmarrëveshjesh u shfaqën vitin e kaluar kur tri deputetë të BDI refuzuan të mbështesin një paketë ndryshimesh kushtetuese për të cilat krerët e partive kishin rënë dakord më herët.
Ndasitë u intensifikuan gjatë zgjedhjeve për degët vendore të BDI. Në korrik, dy anëtarë të partisë mbetën të vrarë në dy përleshje të ndryshme me armë që ndodhën brenda pak ditësh në qytetet e Kumanovës dhe Strugës.
BDI ndërkohë pretendon se ndasitë në parti janë të parëndësishme.
Qendra e shtypit tha vetëm se ajo nuk qe e informuar për çfarë po ndodhte. “Ne nuk jemi informuar se ndokush po anulon anëtarësimin e vet,” tha partia.
BDI u krijua në vitin 2002, shumë shpejt pas konfliktit të armatosur mes kryengritësve shqiptarë dhe forcave të sigurisë, konflikt që u zgjidh me ndërmjetësim ndërkombëtar.
Që nga krijimi, kjo parti është udhëhequr nga ish komandanti i kryengritësve Ali Ahmeti.