![](https://www.reporter.al/wp-content/uploads/01.11.2015-M.Mahilaj@aspbm.jpg)
Monitorimi nga shoqatat mjedisore zbulon se vetëm në dy muajt e fundit janë regjistruar mijëra raste të shkeljes së moratoriumit të gjuetisë.
![Një gjahtar në brigjet e Liqenit të Shkodrës në 01.11.2015 | Foto nga : M.Mahilaj](https://www.reporter.al/wp-content/uploads/01.11.2015-M.Mahilaj@aspbm-600x360.jpg)
Shoqata për Ruajtjen dhe Mbrojtjen e Mjedisit Natyor në Shqipëri (PPNEA) dhe Shoqata për Ruajtjen e Shpendëve dhe Gjitarëve të Shqipërisë (ASPBM), nëpërmjet një njoftimi për shtyp të enjten ngritën shqetësimin lidhur me shkeljet e vazhdueshme të moratoriumit të gjuetisë të vëzhguara në muajt e fundit.
Grupet e monitorimit në terren të këtyre organizatave dhe rrjetet e bashkëpunëtorëve të tyre në rajone të ndryshme të Shqipërisë, kanë konstatuar dhe dokumentuar një intensifikim të lartë të rasteve të gjuetisë së paligjshme, veçanërisht në periudhën nëntor 2015 – janar 2016.
“Vetëm përgjatë 2 muajve të fundit janë konstatuar dhe dokumentuar 1507 raste të gjuetisë së paligjshme, dhe pritet që këto raste të shtohen, veçanërisht përgjatë kësaj fundjave ku është parashikuar një rënie e ndjeshme e temperaturave, ç'ka shkakton grumbullimin e grupeve të mëdha të shpendëve dimërues në zonat ligatinore,” thanë dy organizatat nëpërmjet një njoftimi për shtyp.
“Gjuetia e paligjshme është konstatuar në të gjithë territorin e vëndit, dhe pothuajse në të gjitha zonat e mbrojtura ligatinore, por edhe në zonat e mbrojtura malore, të cilat kanë qënë në fokus të monitorimit, duke mos kursyer as llojet e rrallë, pjesë e listës së kuqe të faunës së Shqipërisë, si huta, kaprolli, ujku, derri i egër,” shtuan ato.
Moratouriumi dy vjeçar i gjuetisë hyri në fuqi në mars të vitit 2014, si masë imediate për mbrojtjen e popullatave të fundit të faunës së egër në Shqipëri, gjëmtuar në vite si pasojë e një gjuetie të shfrenuar, dhe nisur nga dispozitat ligjore në fuqi, afati i këtij moratoriumi përfundon në 15 mars të këtij viti.
Organizatat vlerësojnë ndikimin tërësor pozitiv që moratoriumi ka patur në uljen e gjuetisë në Shqipëri në këto dy vjet, por shprehin shqetësimin se në muajt e fundit, zbatimi i tij ka rënë ndjeshëm dhe situata e vëzhguar në terren cënon seriozisht suksesin dhe përmbushjen e objektivave të moratoriumit.
Sipas PPNEA dhe ASPBM zonat më problematike ku janë regjistruar shkeljet rezultojnë ato ligatinore-bregdetare si Laguna e Patokut në rrethin e Lezhës, Ligatina e Fllakës në afërsi të Durrësit, Laguna e Vilunit në rrethin e Shkodrës, kompleksi ligatinor Vjosë – Nartë në rrethin e Vlorës etj, ku numri i fushëzave të gjahtarëve në disa prej zonave të përmendura është dyfishuar vetëm përgajtë dy javëve të fundit.
Gjithashtu e njejta situatë problematike paraqitet edhe në zona të tjera, në mënyrë të veçantë në rajonin Pukë-Mirditë, në rajonin e Korçës, rajonin e Tropojes.
Duke nënvizuar gjëndjen alarmante dy organizatat mjedisore “u bëjnë thirrje të gjithë insititucioneve ligjzbatuese në vend, veçanërisht Ministrisë së Mjedisit dhe asaj te Rendit, të marrin masa të menjëhershme për vënien nën kontroll të gjuetisë së paligjshme, duke mbrojtur kështu popullatat tashmë të tejet të rrezikuara të faunës së egër në Shqipëri.”
![Gjahtar në malin e Munellës | Foto nga : PPNEA](https://www.reporter.al/wp-content/uploads/PPNEA-1-600x360.jpg)