![](https://www.reporter.al/wp-content/uploads/MehmetAkif640.jpg)
Kryeministri Ramush Haradinaj shkarkoi nga puna drejtorin e Agjencisë së Inteligjencës dhe ministrin e brendshëm pasi një grup shtetasish turq u arrestuan dhe mendohet se janë deportuar pa dijeninë e tij.
![](https://www.reporter.al/wp-content/uploads/MehmetAkif640-533x400.jpg)
Kryeministri i Kosovës Ramush Haradinaj të premten kërkoi largimin e menjëhershëm të kreut të Agjencisë së Inteligjencës së Kosovës, Driton Gashi dhe ministrit të brendshëm Flamur Sefaj, pasi një grup shtetasish turq u arrestuan dhe deportuan sipas pretendimeve pa dijeninë e tij.
Lajmërimi thoshte se Haradinaj nuk ishte informuar rreth “deportimit sekret dhe urgjent” të gjashtë shtetasve turq.
“Operacioni… u krye pa informimin tim apo pa kërkuar lejen time si kryeministër,” theksoi Haradinaj.
Ligji për Agjencinë Kosovare të Inteligjencës, AKI, thotë se shkarkimi i drejtorit të AKI-së kërkon firmën e presidentit të Kosovës, Hashim Thaçi.
Policia të enjten arrestoi disa punonjës të kolegjeve turke në Kosovë, që thuhet se ishin të lidhur me klerikun në mërgim Fetullah Gylen, të cilin Turqia e quan një terrorist.
Por, pas arrestimit, një numër zyrtarësh të lartë deklaruan se nuk ishin të informuar për operacionin.
Raportet e para thanë se tre persona u arrestuan në Gjakovë dhe dy të tjerë në Prishtinë, që punonin për rrjetin e shkollave Mehmet Akif në Kosovë. Raportet thanë se ishin deportuar pothuajse menjëherë në Turqi.
Presidenti Thaçi, kryetari i Kuvendit, Kadri Veseli, kryeministri Haradinaj dhe ministri i jashtëm, Behgjet Pacolli e dënuan operacionin si të nxituar.
Megjithatë, nuk është e qartë ende e qartë se ku po mbahen personat e arrestuar.
Familjet dhe avokatët e të arrestuarve dyshojnë se ata janë ende në Kosovë. Familjet kanë kërkuar një takim me Haradinajn për të kërkuar sqarime, pasi thonë se nuk i besojnë ambasadës turke.
Gjatë një sesioni parlamentar, Haradinaj u tha deputetëve se, sipas informacioneve të tij, të arrestuarit u deportuan të enjten pasdite.
Ndërkaq presidenti i Turqisë Rexhep Tajip Erdogan tha në një takim të partisë në Ankara të premten se operacioni i deportimit u krye nga agjencia turke e inteligjencës.
“Agjencia jonë e inteligjencës i solli gjashtë terroristët kryesorë FETO në Turqi në bashkëpunim me institucionet lokale [të Kosovës] dhe iu dërguan policisë dhe drejtësisë. Siç thamë më parë, ata do të largohen por ne do t'i kapim. Kudo që janë, do t'i gjejmë dhe do t'i kthejmë në Turqi,” tha ai.