![](https://www.reporter.al/wp-content/uploads/lipivani2.jpg)
Dhjetë ish zyrtarë të Autoritetit Portual Durrës akuzohen nga prokuroria se shkelën barazinë në tendera dhe shpërdoruan detyrën në prokurimin e një ambulance dhe të një mjeti zjarrëfikës.
![](https://www.reporter.al/wp-content/uploads/lipivani2-534x400.jpg)
Gjykata e Durrësit vendosi të mërkurën masën e sigurisë detyrim paraqitje për 10 zyrtarë të Autoritetit Portual Durrës – përfshirë ish drejtorin Aleksandër Lipivani, të cilët akuzohen për veprën penale të shpërdorimit të detyrës dhe shkeljes së barazisë në tendera.
“Nga kryerja e veprimeve hetimore në funksion të procedimit penal të regjistruar në vitin 2017, rezulton se këta zyrtarë të Autoritetit Portual Durrës, gjatë ushtrimit të detyrës, janë përfshirë në veprime të kundra-ligjshme gjatë zhvillimit të tenderit për blerje automjeti, auto-ambulance dhe mjeti zjarrfikës,” tha Policia e Shtetit në një njoftim për shtyp.
“Ekspertimi i kryer në lidhje me ofertat e paraqitura për 3 lote të tenderit, ka dokumentuar se ofertat nuk ishin të rregullta dhe janë hartuar nga i njëjti operator ekonomik,” shtoi ajo.
Aleksander Lipivani u emëruar në krye të Autoritetit Portual Durrës, APD, në vitin 2016 si propozim i Lëvizjes Socialiste për Integrim dhe u largua në Tetor 2017, pas fitores së Partisë Socialste në zgjedhjet parlamentare të qershorit 2017. Më herët Lipivani kishte shërbyer edhe si drejtor i Autoritetet të Aviacionit Civil nga viti 2014 deri ne vitin 2016.
Z. Lipivani nuk ishte i arritshëm për koment të mërkurën në mbrëmje.
Sipas Policisë së Shtetit, hetimet kanë zbuluar se APD nuk e kishte provuar nevojën dhe domosdoshmërinë për të blerë një zjarrëfikse dhe autoambulancë përpara tenderit, ndërkohë që në lotet e tenderit mungojnë pajisjet shtesë dhe shpëtuese kundër zjarrit.
Policia gjithashtu nënvizoi se është dokumentuar se përcaktimi i fondit për blerjen e automjeteve nuk është përcaktuar nga drejtoria e duhur, ccfarë sipas saj ngarkon me përgjegjësi penale titullarin e institucionit.