![](https://www.reporter.al/wp-content/uploads/DSC_1403-e1546870843268.jpg)
Qindra studentë marshuan të hënën para kryeministrisë duke kërkuar plotësimin e kërkesave të tyre dhe “jo ndryshime sipërfaqësore të ministrave”.
![](https://www.reporter.al/wp-content/uploads/DSC_1403-600x400.jpg)
Me thirrjet “anuloni ligjin” qindra studentë rinisën bojkotimin e mësimit dhe protestat pas një pushimi të shkurtër gjatë fundvitit.
Pasi varën parulla “Bojkot” në disa fakultete dhe i vunë kyçin dyerve, studentët protestues marshuan të hënën drejt kryeministrisë, ku zhvilluan për disa orë protestën e tyre.
Ata kërkuan anulimin e ligjit të arsimit të lartë, duke e quajtur atë të dështuar, ndërsa hodhën poshtë “paktin për universitetin” të prezantuar nga kryeministri Rama në fund të dhjetorit.
Pas dështimit të thirrjeve për dialog me studentët dhe një përballje të ashpër disa-ditore në auditore me studentë në Tiranës dhe rretheve, kryeministri Rama vendosi të ndryshojë qëndrim dhe të plotësojë disa nga kërkesat e studentëve.
Në një konferencë për shtyp më 26 dhjetor të thirrur pas një mbledhje të qeverisë, Rama shpalli se ishin miratuar disa VKM për të plotësuar kërkesat.
Kryeministri lajmëroi se ishte vendosur krijimi i një platforme online për transparencën në universitete, shtimi i investimeve për mirëmbajtjen e konvikteve, ngarkimi i Ministrisë së Arsimit për kontrollin antiplagjiaturë, krijimi i një biblioteke dixhitale, lëshimi i kartës së studentit brenda dhjetorit 2019, kontrolli dhe vlerësimi studentor përmes një sondazhi të preformancës së pedagogëve, si dhe shkarkimi i anëtarëve të bordeve dhe emërime të reja me proces të hapur.
Lidhur kërkesën kryesore të studentëve për përgjysmim të tarifës së regjistrimit, kryeministri u shpreh se “do t'i jepej një mundësi e ndershme çdo studenti”, duke ofruar pagesa 50 për qind të tarifës së regjistrimit në bachelor për çdo student dhe shtoi se studentët nga familje në ndihmë ekonomike, si edhe të verbrit dhe studentët paraplegjikë e tetraplegjikë përfitojnë financimin 100% të tarifës së regjistrimit.
Reduktime dhe bursa u dhanë gjithashtu për studentët ekselentë. Studentët në nevojë dhe ata me mesatare mbi 9 përfituan edhe në ciklin Master të studimeve 50 deri në 100 pagim nga shteti të tarifës së regjistrimit.
Studentët megjithatë e quajtën tallje të kryeministrit me ta shpalljen e uljes së tarifës së regjistrimit.
Ligji për Arsimin e Lartë Nr. 80/2015 përcakton se “Tarifa e regjistrimit” është vlera monetare që paguan studenti për t'u regjistruar në një program studimi, ndërsa “Tarifa e shkollimit” është vlera monetare që paguan studenti për ndjekjen e një programi studimor.
Tarifa e shkollimit e cila ka koston më të lartë tek studentët nuk u prek nga VKM-të e nxjerra së fundmi. Në Fakultetin e Shkencave Sociale për shembull tarifa e shkollimit shkon deri në 40,000 lekë, kurse tarifa e regjistrimit është 1,650 lekë.
Të paplotësuara mbetën kërkesat për përfaqësim 50% të votës studentore dhe rritja e buxhetit për arsimin në 5%.
Më 28 nëntor, Rama vendosi gjithashtu shkarkimin e gjysmës së ministrave të tij, përfshirë dhe ministren e Arsimit dhe Sportit, Lindita Nikolla, për shkak të “shuplakës” së ardhur për qeverinë nga protesta studentore.
Një grup aktivistesh nga lëvizja studentore Për Universitetin dolën gjithashtu të bashkuara me një gjest simbolik të hënën – shprehur përmes veshjes së fundeve në protestë.
“Është një gjest kundër ngacmimeve seksuale në auditore, por edhe kundër ndrydhjes që kërkon shoqëria shqiptare të imponojë te vajzat duke u treguar se çfarë mund të veshin apo si të veprojnë,” shpjegoi një aktiviste për BIRN.
Thirrja e ish-kryeministrit demokrat Sali Berisha për solidarizim të qytetarëve me protestën e studentëve rriti moshën mesatare të protestuesve, por gjithashtu krijoi dy qendra gjatë tubimit, ku studentët bënë thirrjet e tyre nga njëra anë dhe mbështetës të Partisë Demokratike mbajtën fjalimet e tyre në anën tjetër pa u përzierë me njëri-tjetrin.
Studentët lajmëruan vazhdimin e protestës.