![](https://www.reporter.al/wp-content/uploads/640x480-vetevendosja-protest.jpg)
Një numër aktivistësh të partisë Vetëvendosje në opozitë në Kosovë njoftuan kërkesën për regjistrim në Gjykatën e Tiranës të një organizate jofitimprurëse të quajtur “Lëvizja Vetëvendosje në Shqipëri” me një platformë që synon bashkim kombëtar, integrim euroatlantik dhe politikë të majtë.
![](https://www.reporter.al/wp-content/uploads/640x480-vetevendosja-protest-300x225.jpg)
Aktivistët e Vetëvendosjes së Kosovës njoftuan dorëzimin e kërkesës për regjistrim organizate në Tiranë në të cilën bëjnë të ditur se synimi i “qendrës” është promovimi i bashkimit të Shqipërisë me Kosovën, integrimin euroatlantik të shqiptarëve dhe antiliberalizmin ekonomik.
Sipas ligjit shqiptar, “qendra” është një nga tre format e organizimit të shoqërisë civile krahas shoqatave dhe fondacioneve.
Broiken Abazi, një shqiptar i Shqipërisë i cili përgjatë dekadës së fundit ka jetuar më së shumti në Kosovë, është zgjedhur drejtor ekzekutiv i qendrës nga themeluesit e saj, të cilët janë shtetas të Shqipërisë dhe janë si nga Shqipëria ashtu edhe nga Kosova.
“Qendra do të punojë në rritjen e vetëdijes se bashkimi kombëtar dhe integrimi i Shqipërisë, dhe më gjerë i shqiptarëve, në strukturat Euro-Atlantike (si Bashkimi Evropian dhe NATO) janë procese që duhen realizuar paralelisht dhe e plotësojnë njëri-tjetrin,” shkruhet në kërkesën për regjistrim në gjykatë të publikuar nga Broiken Abazi në faqen e tij në Facebook.
” Qendra vlerëson se modeli neoliberal i aplikuar në ekonomi si dhe mungesa e një ekonomie të bazuar në prodhim, i kanë përqendruar të mirat materiale, dhe në përgjithësi kapitalin, në duart e një pakice të vogël në Shqipëri dhe në trevat e tjera shqiptare të rajonit, duke krijuar pabarazi të skajshme dhe varfëri për një pjesë të madhe të popullit shqiptar,” vijon më tej deklarata duke paralajmëruar luftë kundër pabarazisë shoqërore.
Lëvizja Vetëvendosje u krijua fillimisht si organizatë e shoqërisë civile para se të transformohej në një parti politike në Kosovë ku u bë një forcë madhore në zgjedhjet parlamentare të vitit 2017 me 27% të votave.
Gjithsesi partitë nacionaliste nuk kanë pasur histori suksesi në zgjedhjet shqiptare. Në një rast, Aleanca Kuq e Zi, një parti politike e nacionalizmit të zhurmshëm, arriti të marrë vetëm 0.6% të votave në zgjedhjet e vitit 2013 para se të zhdukej.
Megjithëse nacionalizmi nuk ka pasur shumë sukses në kutitë e votimit, kryeministri shqiptar Edi Rama është përpjekur në vijimësi të përdorë nacionalizmin si mjet politik. Në janar, Rama deklaroi për të disatën herë se brenda pranverës ‘do të hapte kufirin me Kosovën' dhe se do ta bënte këtë sipas modelit të marrëveshjes së Shengenit, e cila hoqi kufijtë në zonën e Bashkimit Europian tre dekada më parë. Që nga janari nuk ka pasur zhvillime të reja në këtë drejtim.