![](https://www.reporter.al/wp-content/uploads/Natasha-Mulaj.jpg)
Pasi BIRN hodhi dritë mbi akuzat për konflikt interesi midis gjyqtarit të Gjykatës Administrative Artur Malaj dhe kryetares së Kolegjit të Posaçëm të Apelimit, Natasha Mulaj, kjo e fundit ka dhënë dorëheqjen nga shqyrtimi i ankimit të Komisionerit Publik kundër subjektit të rivlerësimit.
![](https://www.reporter.al/wp-content/uploads/20180910_125649_100918008-3_5ip2h61-600x355.jpg)
Një trupë gjyqtarësh të Kolegjit të Posaçëm të Apelimit pritet të mblidhen për të shqyrtuar heqjen dorë të kryetares së Kolegjit të Posaçëm të Apelimit, Natasha Mulaj nga shqyrtimi i çështjes nr. 34/2018, datë 13.11.2018, që i përket subjektit të rivlerësimit Artur Malaj.
Dorëheqja e kreut të KPA-së nga çështja zbulohet nga një urdhër delegimi kompetencash i datës 7 maj për gjyqtarin Luan Daci, i cili është publikuar në fletoren zyrtare. E pyetur nga BIRN nëpërmjet një zëdhënësje, gjyqtarja Mulaj nuk komentoi menjëherë të premten mbi arsyet e heqjes dorë nga gjykimi.
Megjithatë, në përgjigje të një kërkese për të drejtë informimi, KPA sqaroi se gjyqtarja Mulaj ka dhënë dorëheqjen me datë 16 prill dhe 3 ditë më vonë është hedhur shorti për caktimin e trupit gjykues që do të shqyrtojë kërkesën e për heqje dorë nga shqyrtimi i çështjes. Trupi gjykues i zgjedhur me short është i përbërë nga gjyqtarja Albana Shtylla kryesuese, Ina Rama, Luan Daci, Rezarta Schuetz dhe Sokol Çomo anëtarë. Seanca për shqyrtimin e kërkesës së dorëheqjes do të mbahet me 27 maj 2019. *
Dorëheqja e gjyqtares Mulaj vjen pas një investigimi të BIRN, i cili raportoi me datë 15 prill, se Operacioni Ndërkombëtar i Monitorimit po shqyrtonte një ankim për konflikt interesi ndaj gjyqtares Natasha Mulaj, e cila akuzohet për konflikti interesi pas përfshirjes së familjarëve të saj në një çështje gjyqësore me një subjekt rivlerësimi.
Lexo më shumë:
Akuzat ndaj kreut të KPA-së, Mulaj rrjedhin nga një çështje për “sigurim padie” në Gjykatën Administrative të Apelit, e ngritur kundër bashkisë Tiranë për kundërshtimin e një lejeje ndërtimi nga shoqëria ‘Construction Management Alliance Albania’ dhe të tjerë – e cila u shqyrtuar nga një trupë gjykuese e udhëhequr nga gjyqtari Artur Malaj.
Kompania ‘Construction Managment Alliance Albania’ është në pronësi të shtetasit Admir Mulaj – vëllai i gjyqtares së Kolegjit, Natasha Mulaj.
Me vendim të datës 9 maj, trupa gjykuese e Gjykatës Administrative e udhëhequr nga Artur Malaj dhe anëtar Rilinda Selimi dhe Lindita Selimi ka vendosur në favor palës paditëse, e cila përfshin dhe familjarët e kreut të KPA-së, duke marrë masë sigurie kundër lejes së ndërtimit.
Malaj u konfirmua në detyrë nga Komisioni i Pavarur i Kualifikimit, por vendimi u ankimua nga Komisioneri Publik në Kolegjin e Posaçëm të Apelimit. Çështja ndaj tij pritet të gjykohet nga një trupë prej pesë gjyqtarësh, e cila përfshin dhe kreun e KPA-së, Natasha Mulaj.
Pala e paditur e akuzon gjyqtarin Malaj për shkelje proceduriale në procesin administrativ, që sipas tyre vijnë si pasojë e interesave të këtij të fundit për të kaluar procesin e vetingut si dhe interesave të familjarëve të gjyqtares Mulaj në këtë çështje.
I pyetur nga BIRN, gjyqtari Artur Malaj i ka mohuar akuzat për konflikt interesi duke deklaruar se nuk kishte njohje me kreun e KPA-së dhe as me familjarët e saj.
*Ky artikull është amenduar me datë 21.05.2019 për të reflektuar të dhënat e marra nga KPA me kërkesë për të drejtë informimi mbi datën e seancës dhe trupin gjykues që do të shqyrtojë dorëheqjen e zonjës Natasha Mulaj nga çështja nr. 34/2018.