![](https://www.reporter.al/wp-content/uploads/37307317_10160541574105153_8084631646675927040_n.jpg)
Ministri i jashtëm në largimi Kosovës Behgjet Pacolli tha se i kishte dorëzuar një sasi të madhe dokumentesh prokurorisë së Kosovës, të cilat vërtetojnë rolin e ushtarëve dhe policëve serbë në vrasjet masive gjatë luftës së viteve 1998-1999.
![](https://www.reporter.al/wp-content/uploads/37307317_10160541574105153_8084631646675927040_n-495x400.jpg)
Behgjet Pacolli tha të martën se i ka dhënë prokurorisë së Kosovës “mijëra materiale që dëshmojnë politikën gjenocidale serbe kundër Kosovës” dhe ofrojnë prova të vrasjeve masive nga Ushtria Jugosllave, Ministria e Brendshme serbe, paraushtarakët e kontrolluar nga Beogradi dhe grupet e armatosura lokale gjatë luftës në Kosovë.
Pacolli shkroi në Twitter se autorët aktualisht “enden të gjithë të lirë në Beograd” dhe se drejtësia ndërkombëtare “ka dështuar në këto krime”.
Ai tha në një konferencë për shtyp më 10 dhjetor se kishte 10,000 faqe dokumente që nuk janë përdorur ende në gjyqe, të cilat dëshmojnë se Serbia kreu krime lufte, krime kundër njerëzimit dhe gjenocid në Kosovë.
Ai tha se dokumentet përshkruajnë krimet në detaje dhe se rreth 95 për qind e kriminelëve të dyshuar të përmendur në to nuk janë paditur.
Pacolli sqaroi se dokumentet “janë marrë nga burime të ndryshme përmes mjeteve ligjore”, por nuk ka dhënë detaje se çfarë lloj dokumentesh janë ato apo se nga kanë ardhur.
Zyrtarët serbë hodhën poshtë pretendimet e Pacollit për prova të rëndësishme.
Ministri i Jashtëm serb Ivica Daçiç tha se ai vetë kishte “me tonelata materiale që tregojnë më së miri kush dëboi cilin nga Kosova dhe Metohija” dhe se ishte i gatshëm t'ia jepte prokurorëve të krimeve të luftës në Hagë.
Pacolli gjithashtu pretendoi të martën se Ministria e Brendshme serbe kishte “dokumente të falsifikuara” të përdorura nga relatori i Këshillit të Europës Dick Marty, i cili shkroi një raport të rëndë në vitin 2010 duke akuzuar luftëtarët e Ushtrisë Çlirimtare të Kosovës për krime lufte.
Raporti i Dick Marty përfundimisht çoi në krijimin e Dhomave të Specializuara me qendër në Hagë, e cila do të nxjerrë në gjyq ish-luftëtarë të UÇK-së për krimet e kryera midis vitit 1998 dhe 2000.
Pacolli tha se përdorimi i dokumenteve që dyshohet se janë falsifikuar nga Serbia ishte njësoj si “të përdorësh nazistët për të gjykuar hebrenjtë të cilët luftuan për liri”.
Kreu i zyrës së qeverisë serbe për Kosovën, Marko Djuriç, u përgjigj duke akuzuar Pacollin për shpërfillje të “viktimave të pafajshme” dhe mohim të “krimeve të UÇK-së terroriste”.