![](https://www.reporter.al/wp-content/uploads/20200117_165419_170120_1_022-2_3Sjeub4.jpg)
Kryetari i komanduar i Bashkisë Durrës, Zhuljen Varfaj, njoftoi dorëheqjen e pa revokueshme nga detyra dhe funksionet e ngarkuara. Ai bëri me dije mesditën e së enjtes se situata shëndetësore është arsyeja që e shtyu drejt vendimit.
“I gjendur para një situate krejtësisht të pafavorshme, madje me rrezik të shtuar për shëndetin tim, parashtroj dhe jap dorëheqjen time të parevokueshme nga detyra dhe funksionet e ngarkuara”, shkruajti Varfaj në një postim në profilin e tij në Facebook.
BIRN mësoi se sot në orën 13:00 pritet mbledhja online e Këshillit Bashkiak Durrës për të komanduar në detyrë një prej 3 nënkryetarëve të Bashkisë Durrës. Një burim zyrtar i tha BIRN se pritet të komandohet Emirjana Sako, e cila më herët ka mbajtur postin e Drejtores së Shërbimeve dhe prej rreth 2 muajsh është emëruar zëvendëskryetare e bashkisë.
Më tej u mësua se Varfaj ishte përballur me vështirësi për të qenë i pranishëm me kohë të plotë në bashki pas situatës së krijuar nga COVID-19 sepse ai vuan nga probleme shëndetësore dhe pritet të operohet. Në mars të këtij viti bashkia e qytetit bregdetar mohoi raportet e atyre ditëve në media për dorëheqjen e kryebashkiakut për arsyet shëndetësore.
Varfaj në deklaratën e dorëheqjes falenderoi dhe vlerësoi Këshillin Bashkiak të Durrësit, për besimin dhe mbështetjen, si edhe falenderoi bashkëpunëtorët përgjatë këtyre viteve në administratën e Bashkisë Durrës, pjesë e së cilës Varfaj ishte si nënkryetar prej vitit 2007.
Ai u emërua në krye të bashkisë nga Këshilli Bashkiak Durrës pas dorëheqjes së papritur të ish-kryetares Valbona Sako në fillim të dhjetorit, pas tërmetit vdekjeprurës që la 51 viktima dhe qindra të plagosur. Dorëheqja e Sakos u shoqërua më një valë largimesh në bashkinë e Durrësit.
Nënkryetarja Etleva Kondi dhe drejtoresha e kabinetit, Keli Kërtusha dhanë dorëheqjen pas Sakos. Kërtusha u zëvendësua në janar nga Rovena Rozhani, deri në atë kohë zëdhënëse për mediat në Ministrinë e Turizmit dhe Mjedisit.
Dorëheqja tjetër ishte ajo e Drita Zenelit, Drejtoreshë e Burimeve Njerëzore, që e la postin të lirë deri në zgjedhjen e drejtoreshës së re, Stela Shkarpa, e cila po ashtu dha dorëheqjen dhe drejtoria mbeti pa drejtues deri në zgjedhjen e Patriot Beqarajt në shkurt të këtij viti.
Adhurim Qehajaj, i cili prej 10 vitesh mbante postin e kreut të urbanistikës në bashkinë e Durrësit dha dorëheqjen dhe u zëvendësua nga Dorina Isufi, që mbante të njëjtin post në bashkinë Shijak. Teksa në bashki mbeten ende pa drejtues disa drejtori.
Presidenti i vendit, Ilir Meta i pyetur nga gazetarët ditën e djeshme për dekretimin e datës së zgjedhjeve të reja lokale në bashkitë që kanë mbetur pa drejtues, si ajo Shkodër, Durrës dhe Vorë, nuk u përgjigj specifikisht.
“Aktualisht shqetësimi i të gjithëve është menaxhimi i situatës së pandemisë nga pikëpamja e shëndetit dhe së dyti nga suksesi apo përmirësimi i kësaj situate do të varet edhe rihapja e ekonomisë gradualisht dhe i gjithë aktiviteti”, u shpreh Meta për gazetarët.