![](https://www.reporter.al/wp-content/uploads/Ogerta-manastirliu.gif)
Komiteti teknik i ekspertëve deklaroi se shqiptarëve do t'u ndalohet të dalin nga shtëpitë nga ora 8.30 e mbrëmjes deri në orën 6 të mëngjesit, duke filluar nga mbrëmja e Krishtlindjeve ndërsa fluturimet drejt Britanisë së Madhe pezullohen për shkak të variantit të ri të virusit.
![](https://www.reporter.al/wp-content/uploads/Ogerta-manastirliu-496x400.gif)
Orari i ndalimqarkullimit për shqiptarët do të zgjatet duke filluar nga e enjtja, masa më e re për parandalimin e përhapjes së koronavirusit të ri, masë e urdhëruar nga Komiteti Teknik i Ekspertëve. Autoritetet shqiptare shprehën gjithashtu shqetësimin në lidhje me një variant të ri të koronavirusit që është identifikuar në Mbretërinë e Bashkuar dhe që ka aftësi të qarkullojë shumë më shpejt se sa variantet e mëparshme.
Ministrja e Shëndetësisë Ogerta Manastirliu deklaroi: “Nga të dhënat e deritanishme, të Qendrës Europiane të Kontrollit të Sëmundjeve mbi variantin e ri të SARS-CoV-2 të identifikuar në Britaninë e Madhe, e cili gjatë javëve të fundit është përballur me një rritje të shpejtë të rasteve të infeksionit, jemi informuar se autoritetet e Britanisë së Madhe dhe vendeve të Bashkimit Europian po vijojnë kryerjen e hetimeve të tjera epidemiologjike dhe virologjike për të vlerësuar më tej impaktin.”
Manastirliu deklaroi se për këtë arsye nga dita e martë (nëser) ora 6 e mëngjesit, fluturimet drejt Londrës do të ndalohen. Aktualisht linja Tiranë-Londër shërbehet nga dy kompani ajrore, Wizz Air dhe British Airways, të cilat kishin nga një fluturim nesër. Pezullimi është i vlefshëm për së paku deri në 6 Janar 2021.
Qytetarët që erdhën sot nga Britania e Madhe do të kenë detyrim të mbajnë një karantinë 14 ditore, deklaroi Manastirliu.
Mbretëria e Bashkuar njoftoi identifikimin e variantit të ri të virusit në fudjavë. Sipas kryeministrit Boris Johnson, mutacioni i ri është deri në 70% më i transmetueshëm se sa variantet e mëparshme. Shumë vende në Europë, Azi dhe Afrikë kanë pezulluar fluturimet për në Britani që nga njoftimi. Belgjika ndaloi udhëtimet e trenit ikonë Eurostar ndërsa familjet në Mbretërinë e Bashkuar sulmuan dyqanet për të blerë rezerva ushqimore.
Një prej rrjeteve të supermarketeve njoftoi se disa produkte të freskëta si sallata, lulelakra dhe brokoli mund të mungojnë në supermarkete brenda pak ditëve për shkak se importohe nga kontinenti Europian.
Federata e Transportit Rrugor të Francës njoftoi se për momentin, shoferët e kamionëve nuk dëshirojnë të transportojnë mallra në Britani për shkak të frikës nga virusi.
Ndalimqarkullimi nga ora 8.30
Ministrja Manastirliu e deklaroi situatën e katër javëve të fundit si “e qëndrueshme” në lidhje me rastet e reja të identifikuara. Rreth 25% e kapaciteteve spitalore mbeten të lira. Pavarësisht kësaj, qytetarët urdhërohen të qëndrojnë në shtëpi duke filluar nga ora 8.30 e mbrëmjes dhe jo nga ora 10 siç ka qenë deri tani. Kjo është një masë që do të vijojë së paku për deri në 4 janar. Për të njëjtën perudhë, të gjitha lokalet, restorantet apo pikat e ushqimit të shpejtë fast food urdhërohet të mbyllen në orën 8.30.
Shqipëria regjistroi 422 raste të reja të hënën dhe 461 raste të dielën, pas ditëve me mbi 800 raste të fillimit të dhjetorit. Por paralelisht me rënien e numrit të rasteve ka rënë ndjeshëm edhe numri i testimeve të raportuara nga Ministria e Shëndetësisë. Ministria raporton në mënyrë jotransparente bashkë testimet e kryera nga sektori publik, ato të sektorit privat si dhe testet e shpejta pa i raportuar këto shifra veçmas.
Sipas Manastirliut, vaksinat që po shpërndahen aktualisht në vendet e pasura kanë efekt edhe kundër variantit të ri të virusit, ndërsa nuk bëri të ditur se kur mund të mbërrijë vaksina në Shqipëri.
Qytetarët rekomandohet gjithashtu që festat e fundvitit të mund t'i festojnë vetëm me rrethin e ngushtë familjar për të ndalur përhapjen e mëtejshme të virusit.