![](https://www.reporter.al/wp-content/uploads/social-media-419944_960_720.png)
Ditën e premte, Drejtoria Vendore e Policisë Vlorë ka njoftuar arrestimin e një 33 vjeçari nga Orikumi, i cili ka përndjekur një 21-vjeçare në rrjetet sociale dhe ka hapur profile me të dhënat e saj personale.
“B.K, 33 vjeç, banues në Orikum ka përndjekur dhe ka hapur llogari në rrjetet sociale me të dhënat e një 21 vjeçare”, citon njoftimi i Drejtorisë Vendore të Policisë së Vlorës .
Së fundmi fenomeni i përndjekjes në rrjetet sociale, i cili përbën një vepër penale, është shtuar ndjeshëm.
Neni 121/a i Kodit Penal të Republikës së Shqipërisë, citon se kjo vepër penale dënohet me burgim nga gjashtë muaj deri në katër vjet.
Pasi e reja ka denoncuar rastin në polici, qytetari nga Vlora është vënë në pranga.
Hetimet janë kryer nga Specialistët për Hetimin e Krimeve Kibernetike, dhe materialet procedurale i kanë kaluar tashmë Prokurorisë, për veprime të mëtejshme.