Pas vendimeve të gjykatës së Tiranës dhe Gjykatës së Apelit Tiranë, të cilat patën rrëzuar kërkesën e Prokurorisë për të bllokuar për efekt hetimi të gjithë arkivën e Inspektoriatit të Deklarimit të Pasurive, Gjykata e Lartë mësohet se ka refuzuar rekursin e Prokurorisë duke i hapur rrugë zhbllokimit të arkivës që pritet të përdoret për procesin e vetingut.
Në fillim të nëntorit 2016, Prokuroria e Përgjithshme deklaroi se pati hapur hetime për “shpërdorim detyre” ndaj kryetarit të Inspektoriatit të Lartë të Deklarimit dhe Kontrollit të Pasurive dhe Konfliktit të Interesave (ILDKPKI) Shkëlqim Ganaj, dhe se për këtë arsye, i duhej të bllokonte për efekt të hetimit të gjithë arkivën e këtij institucioni, arkivë në të cilën gjenden formularët e vetëdeklarimit të pasurive të të gjithë zyrtarëve të lartë të Shqipërisë, përfshirë gjykatës e prokurorë.
Sipas Prokurorisë, bllokimi i dosjeve qe i nevojshëm për të hetuar Ganajn, i cili, sipas dyshimit të prokurorisë, ka shpërdoruar detyrën duke mos hetuar raste të dyshuara të konfliktit të interesit.
Menjëherë pas kësaj, ILDKPKI iu drejtua me shtatë ankesa Gjykatës së Tiranës ku kërkohej rrëzimi i urdhërave të ndryshëm për bllokim të lëshuara nga prokuroria. Gjykata e Shkallës së Parë Tiranë dhe ajo e Apelit të Tiranës i dhanë të drejtë Inspektoriatit dhe rrëzuan prokurorinë ndërsa së fundmi, Gjykata e Lartë mësohet se ka refuzuar rekursin e prokurorisë në lidhje me këtë çështje.
Sipas vendimit të gjykatës së Apelit, Prokuroria urdhërohet të dorëzojë dosjet e sekuestruara ndërsa lejohet të vijojë hetimet për konflikt interesi ndaj deputetëve Rakip Suli e Valentina Leskaj si dhe ish-deputetit Koço Kokëdhima, për të cilët prokuroria dyshon se Ganaj ka shpërdoruar detyrën duke mos hetuar.
Por ndërsa gjykatat e panë të arsyeshme hetimin e Ganajt në lidhje me mosveprimet e institucionit të tij në rastet e tre deputetëve, të cilët dyshohet se kanë përfituar fonde apo asete publike për vete apo persona të lidhur me ta, ndërkohë që kushtetuta e ndalon ndërveprimin ekonomik të deputetëve me buxhetin e shtetit apo pronën publike, prokuroria pati përdorur rastin për të lëshuar shtatë urdhëra bllokimi për të gjithë arkivën e ILDKPKI.
Në kërkesën ankimore të ILDKPKI-së , prokuroria akuzohej se është vënë në veprim për nisjen e hetimeve penale, për qëllime jo të ligjshme. “Prokuroria nuk arsyeton se përse një hetim që përfshin më pak se tre vite veprimtari dhe vetëm 3 subjekte, kërkon të sekuestrojë të gjitha të dhënat që lidhen me gjithë vitet e ushtrimit të veprimtarisë nga ILDKPKI dhe me të gjithë subjektet që mbartin detyrimin për të deklaruar pasurinë dhe interesat private”.
Burime zyrtare nga ILDKPKI i thanë BIRN se në bazë të vendimit më të fundit të Gjykatës së Apelit prokuroria duhet të dorëzojë të gjitha dosjet e sekuestruara gjatë një jave në zyrat e këtij institucioni, ndërkohë që nuk ka animuar vendimet për hetimet e deputetëve Suli, Leskaj, dhe ish deputetit, KoçoKokëdhima.
Pas vendimit të Gjykatës së Apelit, burime zyrtare të Prokurorisë deklaruan se hetimi i nisur kundër kreut të ILDKPI-së, Shkëlqim Ganaj do të vijojë normalisht dhe se këto vendime nuk do të ndikojnë në procedurat hetimore që kanë nisur në fund të vitit të shkuar. Hetimet e prokurorisë nisën në kohën institucioni i drejtuar nga Ganaj është i përfshirë në procesin e marrjes në sitë e deklaratave të pasurisë së gjyqtarëve dhe prokurorëve, si pjesë e procesit e të vetingut, konkretisht të ligjit “Për rivlerësimin kalimtar të gjyqtarëve dhe prokurorëve në Republikën e Shqipërisë.”
Bllokimi pati ngritur shqetësime se mund të shërbente si një masë penguese për procesin e vetingut të gjyqtarëve dhe prokurorëve, i cili pritet të nisë së shpejti. Tani që gjykatat kanë rrëzuar pretendimet e prokurorisë, pritet që ILDKPKI të rikthehet në punë normalisht.