![](https://www.reporter.al/wp-content/uploads/20190619_124435.jpg)
Shqipëria po përjeton tensione politike nga veriu në jug ndërsa zgjedhjet vendore të 30 qershorit po afrohen në kushtet kur presidenti ka deklaruar anulimin e tyre ndërsa qeveria kërkon të votohet me çdo kusht. Ky është blogu i BIRN për zhvillimet orë pas ore. Jepi Refresh programit tuaj të lundrimit në internet për t'u informuar për zhvillimet e fundit.
Ora 16:30: Zyra e OSBE-së në Tiranë dënoi dhunën e mbështetësve të opozitës dhe bëri thirrje për ndëshkimin e dhunuesve. Në një deklaratë për shtyp, OSBE tha se “jo vetëm autorët e dhunës, por edhe nxitësit e saj, duhet të mbajnë përgjegjësi ligjore.”
![](https://www.reporter.al/wp-content/uploads/20190619_115346-533x400.jpg)
Ora 15:55:Protestuesit e opozitës dhe punonjës të bashkisë u tërhoqën pas disa përplasjeve me policinë në Gjirokastër, por i dhanë ultimatum KZAZ-së në qytet që të lironte mjediset e zëna deri në orën 11 të ditës së enjte.
Ora 15:30:Drejtues të policisë Kukës i thanë BIRN se pas tërheqjes së materialeve nga mjediset që u sulmuan paraditen e të mërkurës nga protestues të opozitës, pritet një vendim i Komisionit Qendror të Zgjedhjeve, që do të caktojë një mjedis të ri.
Ora 15:14: Partia Demokratike e Shkodrës kërkoi të mërkurën lirimin e menjëhershëm të të arrestuarve nga policia pas protestës së zhvilluar tek KZAZ 3 në shkollën “Shejnaze Juka”. Pesë përsonat, përfshi dy punonjës të policisë bashkiake, janë arrestuar me akuza të dëmtimit të pronës. Ata akuzohet se i vunë zjarrin një klase të gjimnazit ku ndodheshin materialet e KZAZ për zgjedhjet.
Në një deklaratë për media kryetari i PD Shkodër Xhevdet Amuli tha se në rast se nuk bëhet lirimi i 5 të arrestuarve atëherë qindra mijëra qytetarë do të zbarkojnë në dyert e policisë vendore të Shkodrës për të protestuar.
Ish-deputetët dhe kreu i PD Shkodër zhvilluan një takim me drejtorin e policisë vendore të Shkodrës Niko Nrahimaj lidhur me 5 të arrestuarit pas protestës tek KZAZ 3 mbrëmë. Sipas përfaqësuesve të opozitës policia nuk do bëjë asnjë hap pas për lirimin e të arrestuarve.
Sipas tyre nuk ka urdhër ndalimi për ish-deputetin Bardh Spahia për të cilin u tha se është shpallur në kërkim. Takimi zgjati për 1 orë e 30 minuta por nuk u gjet një zgjidhje e përbashkët.
![](https://www.reporter.al/wp-content/uploads/lleshaj-ministri-i-brendshem-300x234.jpg)
Ora 15:00: Ministri i Brendshëm Sandër Lleshaj deklaroi se qeveria ka ndër mend të “shkrijë” policitë bashkiake në bashkitë ku kjo e fundit i përplas me policinë e shtetit. Lleshaj nuk bëri të ditur se mbi çfarë baze ligjore do të kryhet një veprim i tillë. Lleshaj i konsideroi policitë bashkiake “rrezik publik”.
Lleshaj refuzoi t'i përgjigjej pyetjeve të gazetarëve.
Ora 14:50: Përplasjet kanë qenë veçanërisht të dhunshme në qytetin e Burrelit në bashkinë Mat ku disa persona janë lënduar gjatë përleshjeve me policinë, raporton gazetari Hysen Likdisha.
Ora 14:48: Në qytetin e Klosit protestuesit kanë djegur materjalet zgjedhore në KZAZ ndërsa policia duket se nuk ka bërë rezistencë, raporton gazetari Hysen Likdisha.
![](https://www.reporter.al/wp-content/uploads/20190619_124435-600x338.jpg)
Ora:13:45: Protestuesit në Kukës vijojnë përpjekjen për të hyrë me forcë në KZAZ. Ata dogjën disa goma dhe synuan të thyenin kordonin e policisë dhe të hynin brenda mjediseve. Policia përdori gazin lotsjellës për t'i shpërndarë, por situata vijoi e tensionuar, raportoi gazetari Bashkim Shala. Policia ndërkohë hoqi nga godina materialet zgjedhore.
![](https://www.reporter.al/wp-content/uploads/64437780_633197187185474_6543119664543694848_n.jpg)
Ora:13:31: Ish-Deputeti i Partisë Demokratike në Shkodër Bardh Spahia është shpallur në kërkim nga policia. Spahia akuzohet për dëmtim të pronës publike. Ai ishte në krye të protestuesve që dogjën materialet zgjedhore dhe një klasë të gjimnazit “Shenaze Juka” ku ndodhej KZAZ në Shkodër.
Tensionet në Shkodër u zhvendosën pranë Drejtorisë së Policisë, ku ndodhen të arrestuarit e përplasjes së mbrëmjes së të martës. Ish-deputetë të PD kanë hyrë në mjediset e policisë dhe kanë takuar drejtorin Niko Brahimaj.
![](https://www.reporter.al/wp-content/uploads/WhatsApp-Image-2019-06-19-at-13.18.33-600x338.jpeg)
Ora 13:22: Pas disa përplasjeve me policinë protestuesit e opozitës në Berat janë shpërndarë, pasi kanë hedhur disa shashka ndaj policisë.
Ora 13:15 Situatë e tensionuar është regjistruar edhe në KZAZ 67 në Pogradec dhe në KZAZ 70 në Devoll, raporton gazetarja Dhorjela Çule.
Përfaqësues të 2 bashkive të djathta dhe militantë të PD dhe LSI pas ultimatumit për lirimin e ambienteve kanë tentuar të hyjnë brenda KZAZ por janë mdaluar nga policia. Rreth orës 11.00 në të dy këto qendr janë shënuar momente të tensionuara por nuk ka patur incidente.
Në Pogradec përballë policisë së shtetit u vendos policia bashkiake ndërsa ish deputeti demokrat Klevis Balliu hodhi akuza se përpjekja për të mbajtur KZAZ në të njëjtin ambient ndërkohë që presidenti ka çdekretuar datën e zgjedhjeve është një grusht shteti. Përfaqësuesit e Bashkisë Pogradec lanë afat deri nesër për lirimin e ambientit që ndodhet tek teatri i kukullave.
Në Devoll protestuesit pas tentativës për të hyrë në KZAZ hodhën bidona uji në drejtim të qendrës dhe më pas u shpërndanë me qetësi.
![](https://www.reporter.al/wp-content/uploads/Berat-1-600x334.jpg)
Ora 12:28: Përplasjet në qytetin e Burrelit përshkallëzohen. Videoja e mëposhtme është marrë nga faqja në internet e TV Mati:
Ora 12:22: Përplasje të dhunshme për kontrollin e KZAZ-ve po zhvillohen aktualisht në shumë qytete nga veriu në jug. Qytetet ku janë shënuar tensione deri tani janë: Bajram Curri, Shkodër, Burrel, Kamëz, Kavajë, Berat, Skrapar, Pogradec dhe Gjirokastër.
Policia ndalon pesë protestues dhe shpall 14 të tjerë në kërkim në Shkodër
Të ndaluarit janë mbështetës të opozitës dhe punonjës të policisë bashkiake dhe akuzohen për krime zgjedhore dhe kundërshtim të forcave të policisë. Lexo më shumë:
Ora 12.07: Në Burrel disa persona rezultojnë të dëmtuar nga përplasja mes protestuesve dhe policisë, raporton gazetari Hysen Likdisha.