Konfirmohet prokurori Gjon Fusha, dy çështje dërgohen për inspektim

Lajme
Komisioni i Pavarur i Kualifikimit vendosi të transferojë për inspektim dy çështje të hetuara nga prokurori Gjon Fusha në vitet 2015 dhe 2019.

Drejtuesi i Prokurorisë së Apelit të Gjirokastrës, Gjon Fusha pas vendimit të KPK.

Drejtuesi i Prokurorisë së Apelit të Gjirokastrës, Gjon Fusha u konfirmua në detyrë të premten. Megjithatë, Komisioni i Pavarur i Kualifikimit vendosi të transferojë dy çështje hetimore për inspektim nga Inspektori i Lartë i Drejtësisë.

Procesi i vetingut për prokurorin Fusha u krye nga Genta Tafa Bungo, Suela Zhegu dhe Pamela Qirko. Gjatë seancës dëgjimore në KPK, prokurori Fusha u përball me dy raporte të ndryshme të Drejtorisë së Sigurimit të Informacionit të Klasifikuar, të cilat hidhnin dyshime mbi hetimin e dy çështjeve penale.

Zhegu sqaroi se nga ana e prokurorisë së Gjirokastrës ishin dorëzuar dy procedimet penale për të cilat DSIK ka ngritur dyshime për paligjshmëri të kryera nga prokurori Fusha. Bashkëshortja dhe njëkohësisht përfaqësuesja ligjore e prokurorit Fusha, Anxhela Fusha e quajti të drejtë vlerësimin e parë të DSIK-së, ndërkohë që u ndal gjatë në qëndrimin e tyre ndaj raportit të dytë që konstaton papërshtatshmërinë.

Ajo renditi disa çështje të përfaqësuara prej bashkëshortit në cilësinë e prokurorit të Apelit Gjirokastër për të cilat tha se mund të kishin lidhje me konstatimet e DSIK. “Ai ka zbatuar vetëm ligjin. Kush e lexon në mënyrë të njëanshme konstatimin e DSIK mund të ngrejë dyshime,” tha ajo.

Hetimi administrativ nuk gjeti probleme të pasurisë, ndërsa prokurori Gjon Fusha mori vlerësim pozitiv për profesionalizmin.