Kolegji i Posaçëm i Apelimit ka vendosur në mënyrë unanime të rrëzojë ankimin e prokurorit Shkëlzen Cena duke lënë në fuqi vendimin e Komisionit për shkarkimin e tij.
Kolegji i Posaçëm i Apelimit, KPA vendosi të mërkurën të rrëzojë ankimin e prokurorit të Dibrës, Shkëlzen Cena, ndaj vendimit të Komisionit të Pavarur të Kualifikimit, KPK që e shkarkoi nga detyra për probleme në tw tri kriteret e rivlerësimit.
KPK shkarkoi nga detyra prokurorin Shkëlzen Cena në qershor të vitit 2019, i cili asokohe kandidonte për një pozicion në Prokurorinë e Posaçme kundër Korrupsionit dhe Krimit të Organizuar, SPAK.
Në vendimin e arsyetuar, KPK argumentonte se shkarkimi u bazua në problemet e konstatuara me pasurinë si dhe për “cënim të besimit të publikut te drejtësia”, lidhur me pastërtinë e figurës dhe profesionalizmin.
KPK identifkon dy raste kur janë gjetur mangësi të hetimit nga ana e Cenës që kanë sjellë favorizimin e dy të pandehurve. Ndërkohë, Komisioni ka konkluduar se prokurori Shkëlzen Cena ka kryer deklarim të pamjaftueshëm dhe të pasaktë për pasurinë dhe se ka pasur mungesë të ardhurash për krijimin e pronave dhe shpenzimet.