Ndryshe nga KPK, Operacioni Ndërkombëtar i Monitorimit i faturon ish-kreut të Krimeve të Rënda hetimet e mangëta dhe rolin e dobët kontrollues në mbylljen e disa hetimeve, ndërsa ngre pikëpyetje për vendbanimin e tij në një apartament “të mbipopulluar nga familjarët”.
Kolegji i Posaçëm i Apelimit vendosi shkarkimin nga detyra të anëtarit më të ri të Gjykatës Kushtetuese, Besnik Muçi për problemet me pasurinë. Me një interpretim alternativ, Muçi tha se KPA nuk ka kompetencë ta shkarkojë atë si anëtar të Gjykatës Kushtetuese, duke u bërë gjyqtari i parë që refuzon të njohë vendimin e vetingut.
Vendimi i Komisionit të Pavarur të Kualifikimit tregon se kryetarja e Gjykatës së Durrësit, Joana Qeleshi dha dorëheqjen 10 ditë pasi i kaloi barra e provës për pasurinë dhe pastërtinë e figurës –duke ndërprerë procesin e vetingut.
Komisioni i Pavarur i Kualifikimit konstatoi mospërputhje dhe mungesë burimesh të ligjshme për pasurinë dhe shpenzimet e gjyqtares së Apelit të Korçës, Brunilda Malo, ndërkohë që ajo e konsideroi procesin të paragjykuar dhe përsëriti kërkesën për hetimin në të tre kriteret.
Kolegji i Posaçëm i Apelimit e quajti konkluzionin e KPK-së se kryetari i Gjykatës së Lartë kishte kryer “evazion tatimor të ligjshëm” një term që sfidon logjikën, ndërkohë që interpretoi peshën e deklaratave periodike në proces si dhe përcaktimin për dyfishin e pasurisë së ligjshme.
Vendimi i arsyetuar i KPK-së rendit si shkaqe të shkarkimit të ish-drejtuesit të Prokurorisë së Përmetit, Hysen Keta “deklarimin e pamjaftueshëm” të kostove reale të ndërtimit të dy shtëpive në truallin e trashëguar nga babai si dhe të të ardhurave të përfituara ndër vite nga qiraja.
