Kreu i shkarkuar i Prokurorisë së Sarandës, Edison Ademi u gjet nga KPK me probleme të etikës në kriterin e aftësive profesionale, ndërsa u penalizua edhe për mosdeklarimin dhe deklarim të rremë të pasurisë nga ana e vëllait të tij, i konsideruar si person i lidhur.
Komisioni i Pavarur i Kualifikimit njoftoi se kishte rihapur hetimet për kreun e Gjykatës së Apelit në Shkodër Fuat Vjerdha. KPK nuk bën me dije arsyet e rihapjes së hetimeve.
Kreu i Gjykatës së Apelit të Shkodrës, Fuat Vjerdha u përball në seancën dëgjimore në KPK-së me disa denoncime, ndërsa nga relatimi nuk u vunë në dukje probleme në kriteret e pasurisë dhe figurës.
Komisioni i Pavarur i Kualifikimit vendosi në shumicë se kryeinspektorja e KLD-së, Marsida Xhaferllari nuk kishte status të magjistratit dhe se për të nuk mund të merrej një vendim. Në pakicë, një nga anëtaret e trupës e cilësoi këtë vendim si “cenim të sigurisë juridike”.
Kolegji vendosi 4 me 1 për shkarkimin e Antoneta Sevdarit, duke arsyetuar se megjithëse kishte të dhëna të punësimit të bashkëshortit në Greqi dhe Arabinë Saudite, mosvërtetimi i pagimit të tatimeve për të ardhurat e siguruara jashtë vendit e penalizonin subjektin.
Kolegji i Posaçëm i Apelimit vendosi të mos hapë hetim mbi dy denoncime identike ndaj gjyqtares Alma Brati. Denoncimet e bëra nga një ish-këshilltare e Kolegjit dhe një person i tretë, sipas Bratit kishin shkelur ligjin dhe shfrytëzuar në mënyrë të paligjshme të dhënat kofidenciale. KPA vendosi të ribëjë analizën finaciare për gjyqtaren.
