Komisioni i Pavarur i Kualifikimit ngre dyshime se gjyqtari i Elbasanit, Bujar Musta ka fshehur një apartament pas kontratave fiktive dhe se nuk ka pasur burime të ligjshme për krijimin e pasurive. Gjithashtu u konstatuan dyshime për veprime të kundërligjshme në ushtrimin e detyrës dhe favorizim të të proceduarve.
Komisioni i Pavarur i Kualifikimit njoftoi konfirmimin në detyrë të prokurorit të Kurbinit Arben Nika, pas rivlerësimit në të tri kriteret.
Gjyqtari i Gjykatës së Matit Artan Çupi i pezulluar nga KPK për probleme të profesionalizmit, ia doli sipas shumicës në Komision të përmirësohej pas një viti në Shkollën e Magjistraturës. KPK e konfirmoi atë me shumicë votash.
Komisioni i Pavarur i Kualifikimit konstaton pasaktësi në deklarimin e pasurive dhe balanca negative në vlera të mëdha, gjetje që u kundërshtuan nga prokurori i Tiranës Dritan Gina. Ai cilësoi të pabazuar dhe dashakeqas edhe një raport negativ të DSIK që ngre dyshime për favorizim të të proceduarve dhe veprime korruptive.
Gjyqtarët Arben Mullaj i Gjykatës së Tiranës dhe Ergys Selmani i Gjykatës Fier kanë dhënë dorëheqjen nga detyra pasi iu është kaluar barra e provës për gjetjet e hetimit administrativ, ndërsa këshilltari ligjor Gent Pejo ishte dorëhequr në vitin 2017.
Gjyqtarja e Fierit, Adelina Zarka pretendoi se kishte pasur burime të ligjshme për krijimin e pasurive dhe se në shqyrtimin dhe vendimarrjen për një çështje me kompaninë “Bankers Petroleum” kishte zbatuar vetëm ligjin.
