Komisioni i Pavarur i Kualifikimit konfirmoi në seancën e të hënës Fiona Papajorgjin. Papajorgji e cila deri tani ka shërbyer si këshilltare ligjore pranë Gjykatës Kushtetuese është kandidate për një vend në këtë gjykatë, e cila pritet të ringrihet nga e para, pasi shkarkimet nga procesi i vetingut dhe dorëheqjet e lanë atë vetëm me dy anëtarë.
Treshja gjykuese që shqyrtoi rastin e Papajorgjit përbëhej nga Brunilda Bekteshi si kryesuese, Roland Ilia relator dhe Olsi Komici anëtar, ndërsa vëzhgues ndërkombëtar ishte Theo Jacobs.
Vlerësimi i këshilltares ligjore pranë Gjykatës Kushtuetuese, e emëruar në këtë institucion me datë 5 shtator 2011, u krye në të tre kriteret, atë të deklarimit të pasurisë, pastërtisë së figurës dhe profesionalizmit.
Gjatë seancës dëgjimore relatori tha se Inspektoriati i Lartë i Deklarimit dhe Kontrollit të Pasurive dhe Konfliktit të Interesit, ILDKPKI kishte dorëzuar një raport negativ për Papajorgjin, duke e cilësuar atë të pasaktë dhe pa dokumentacionet e nevojshme, por me burime të ligjshme.
Sipas ILDKPKI-së dhe KPK-së Papajorgji duhej të paraqiste dokumente në lidhje me një shumë të përfituar si bursë nga Bashkimi Evropian në vlerën e 35 mijë eurove e cila kishte shërbyer për investime të tjera. Subjekti tha gjatë seancës dëgjimore se po priste ende mbërritjen e dokumenteve me vula apostile dhe se vonesat kishin ardhur për shkak të kohës që kishte kaluar.
Papajorgji nuk pati probleme sa i përket kriterit të figurës dhe profesionalizmit.
