Kolegji i Posaçëm i Apelimit ka mbajtur në fuqi vendimin e Komisionit të Pavarur të Kualifikimit për shkarkimin nga detyra të ish-kreut të gjykatës së Pukës, Izet Kadana.
Trupi gjykues i Kolegjit të Posaçëm të Apelimit i përbërë nga Ina Rama kryesuese, Rezarta Schuetz relatore, Ardian Hajdari, Luan Daci, Sokol Çomo la në fuqi të mërkurën vendimin e KPK për shkarkimin nga detyra të gjyqtarit Izet Kadana.
Sipas KPK-së Kadana rezultoi me pasuri të pajustifikuara, me lidhje familjare me persona të dyshuar për aktivitet të krimit të organizuar si dhe me probleme me etikën në punë për rastin e punësimit të bashkëshortes në prokurorinë e Pukës.
Izet Kadana e ka nisur karrierën në sistemin e drejtësisë në vitin 1993 dhe prej më shumë se 15 vitesh punon si gjyqtar në Gjykatën e Pukës. Në një mbledhje të KLD-së në vitinb 2016, Kadana u emërua kryetar i kësaj gjykate.
Trupa gjykuese e KPK përbëhej në rastin e subjektit Kadana nga Lulzim Hamitaj, Xhensila Pine dhe Firdes Shuli.
Vendimi i Kolegjit të Posaçëm të Apelimit për Kadanën është përfundimtar.